Мицкоски од Гостивар: Граѓаните имаат еден проблем, а тоа е Владата на СДСМ и ДУИ

Лидерот на ВМРО ДПМНЕ Христијан Мицкоски денес во Гостивар изјави дека единствено решение на проблемите на граѓаните е пораз на актуелната власт. На новинарско прашање: Што ќе се преземе во однос на закочениот закон за лични карти во Собранието, со оглед дека граѓаните кои немаат лични карти не можат да се попишат и да учествуваат на избори, Мицкоски одговори:

„Граѓаните коишто не можат да го остварат своето уставно загарантирано право имаат еден проблем: Владата на СДСМ и ДУИ. Единствен начин да се надминат сите тие проблеми е да се делува инвазивно, а тоа е победа на здружената опозиција и катастрофален пораз на оваа Влада предводена од СДСМ и ДУИ. Тоа е единстевниот начин да се надминат сите проблеми на граѓаните. Доколку и понатаму ги додаваме проблемите едни на други, а решение го одложуваме ништо не сме направиле. Она што е моја порака е конечен пораз на локалните избори за нив, ново владино мнозинство веднаш потоа, нови луѓе со нова визија мотивирани и храбри да работат во интерес на граѓаните.“

Прашан за коментар за спроведувањето на новите антиковид мерки Мицкоски рече: „Уште една нивна катастрофа, поделба на граѓаните како во минати времиња. Поделбите не носат решенија, туку ги продлабочуваат. Уставно загарантирано право е правото на избор и живот, иако јас сум од онаа страна која повикува на вакцинирање, нема никогаш да си дозволам да правам поделба на граѓаните“.