Од 30 хоспитализирани ковид пациенти во Гостивар, само еден е вакциниран со две дози

По број на активно заразени со коронавирус, регионот на Гостивар е на трето место во земјава, после Тетово и Скопје. Министерството за здравство секојдневно потврдува новозаразени, а во пораст е и бројката на хоспитализирани. Освен на инфективно, ковид болни веќе се примаат повторно и во модуларната болница. Вкупно на болничко лекување се 30 пациенти.

„На инфективното одделение имаме 21 пациент. Од нив 6 се на постојана кислородна поддршка, додека двајца на повремена. Во модуларната болница вкупно има 9 пациенти од кои 6 постојано добиваат кислород. Меѓу хоспитализираните најголемиот дел се од 40 до 55 години, но има и пациент на 30 годишна возраст како и неколку постари до 76 години. Сите се невакцинирани, освен еден денес што е примен, кој е вакциниран со две дози. Тој пациент има воспаление на белите дробови, висока седиментација поради што е и задржан во болница. Инаку се чувствува добро и сатурацијата му е добра.“, информираше раководителот на инфективното одделение д-р Ратко Наумоски, кој состојбата со коронавирусот во Гостивар ја оцени како многу тешка.

Голем е бројот и на позитивни пациенти кои се јавуваат за амбулантски прегледи. Денес до 11 часот во амбулантата на инфективно се обратиле 20-тина.