Околу 10 милиони денари за чистење на снегот во Гостивар, во тек е тендер за избор на фирма

Во пресрет на годинешната зимска сезона, Општина Гостивар започна со подготовките за  одржување на улиците и патиштата кои се под нејзина надлежност. Во тек е тендерот за избор на фирма што ќе го чисти снегот и ќе набави индустриска сол за зимско одржување.

За чисти улици и патишта во зима локалната самоуправа ќе издвои 10 милиони денари од буџетот.

„Општина Гостивар е веќе во подготовка за зимско одржување, во процедура е јавниот оглас за избор на фирма. Планирани се средства од околу 10 милиони денари кои би се искористиле за одржувањето. Инаку, во секојдневен контакт сме и со јавните претпријатија кои ќе потпомогнат за зимско одржување, а во есенскиот период ќе спроведуваат активности за чистење на канализациите, шахтите за да немаме поголеми проблеми со пообилни врнежи“, изјави претседателот на Советот, Валбон Лимани.

Како што е наведено во тендерот, од фирмата се бара да располага со специјални машини и возила како: булдожер, грејдер, камиони со плуг и слично, како и да има минимум седум вработени или ангажирани лица.

Тендерот трае до 3о октомври, кога ќе има јавно отворање на понудите.