По 3 тони кислород дневно за ковид пациенти троши болницата во Гостивар

Секојдневно високи бројки на новозаразени со коронавирус, преполни болнички капацитети, значителен број смртни случаи. Состојбата со ковид во Гостивар не се смирува. На инфективното, интерното и нервното одделение, како и во модуларната болница хоспитализирани се 108 пациенти, од кои 68 се ставени на кислородна поддршка.

Освен бројките на нови позитивни и болнички згрижени пациенти, рекордна е и потрошувачката на кислород за третман на пациените.  Се трошат до 3 тони на дневна основа.

„Централниот довод има капацитет од околу 2 тона, но последните денови сме приморани да го засилиме, и се организираме да обезбедиме плус од 80 до 100 кислородни боци. Што значи дека вкупно дневно се трошат по околу 3 тони кислород. Успеваме да го обезбедиме тоа количество, потрошувачката навистина е многу голема, но важно е пациентите да бидат снабдени со кислород и ние тоа го правиме на најдобар можен начин. Снабдувачот ни стои на располагање во било кое време, во недела, сред ноќ, така што секогаш сме доволно снабдени со кислород и системот функционира 24 часа.“, изјави директорот на болницата во Гостивар д-р Јакуп Јакупи.

Доколку растечкиот тренд на хоспитализации продолжи, и има потреба, заболени од Гостивар ќе се препраќаат во болници во други градови, за што веќе се прават координации. „Од вчера контактиравме со министерот за здравство и со директорите во болниците во Струга, Охрид, Прилеп и Битола со молба, да излезат во пресрет ако во случај има потреба да сместиме пациент во критична состојба кој не можеме да го згрижиме ние. Добивме согласност дека со најава ќе може да ги препратиме таму пациентите. Со транспорт сме организирани.“, вели директорот.

За една недела во Гостивар потврдени се 988 новоинфицирани со коронавирусот, а починале 21 пациент. Како оздравени се евидентирани 230 граѓани.