Полицијата во Гостивар домаќин на деветтоодделенци

Деветтоодделенци од основното училиште „Гоце Делчев“ во Гостивар заедно со свои наставници денес беа во посета на Полициската станица. Тие имаа можност одблизу да се запознаат со функционирањето и улогата на чуварите на јавниот ред и мир на гостиварска територија.

Гостите беа примени од раководните лица на станицата кои им дадоа можност да ги разгледаат различните служби и организираа демонстрација на опремата и возилата коишто полициските службеници ги користат при извршување на задачите: радарите со кои се мери брзина на движење на возилата, опремата за увид на лице место и слично.

„Оваа посета е со цел децата да се запознаат со работата на полицијата, ингеренциите кои ги има, начините на коишто може да им помага на граѓаните, потоа како и каде се пријавуваат евентуални проблеми и слично. Децата се возбудени што добија можност од прва рака да се информираат и да ја разгледаат опремата, просториите, возилата.“, рече Александра Манојлоска, наставник во ОУ „Гоце Делчев“.

Денешната посета на Полициската станица Гостивар претставува дел од активностите за афирмација и унапредување на отвореноста на полицијата кон граѓаните, зајакнување на меѓусебната доверба и проширување и продлабочување на двонасочната соработка со граѓаните, посебно со младите.