Приведени осомничени за нападот врз Британецот

Четири лица биле приведени во Полициската станица Гостивар, под сомнение дека го извршиле разбојништвото врз британскиот државјанин во вторникот приквечер на регионалнаиот пат Бунец-Маврово. Како што соопштуваат од полицијата, лицата биле приведени и задржани во ПС Гостивар, во координација и со наредба на јавен обвинител. Поединостите врзани во случајот се уште се утврдуваат.

Според исказот на Британецот, тој бил пресретнат и нападнат додека се возел со велосипед, на регионалниот пат близу паркинг простор. Лицата го врзале, го внеле во возило и му ги одзеле платежните картички што ги поседувал и 2.000 денари. Искористувајќи момент кога бил сам со еден од напаѓачите, британскиот државјанин се ослободил и на напаѓачот му задал неколку удари со нож што го имал во себе. Откако избегал во блиската шума, преку социјалните мрежи ги алармирал родителите и пријателите. Тие се обратиле до британската полиција, која преку Британската амбасада во Скопје ја известила полицијата во Гостивар, по што била иницирана потрага и тој бил пронајден во близина на каменолом наредното утро.