Скоро 500 физички напади, тепачки, расправии регистрирани лани во полошкиот регион

Минатата година на подрачјето кое го покрива Секторот за внатрешни работи Тетово регистрирани се вкупно 489 нарушувања на јавниот ред и мир, што е 16 проценти помалку во споредба со 2016-та година. Полицијата соопштува дека најголемиот број од нарушувањата се целосно расчистени и заокружени со 533 барања за поведување прекршочни постапки. Во случаите учествувале 785 сторители, од кои најголемиот дел мажи и триесетина жени.

„Најмногу од овој вид прекршоци се случиле во град, на улица или во угостителски објекти. Меѓу сторителите, најбројни се оние на возраст над 25 години, а се среќаваат и малолетници. Што се однесува до социјалната структура на прекршителите, најмногу сторители лани биле невработени, околу 400.“, стои во информацијата од СВР.

Меѓу нарушувањата доминираат физичките напади со вкупна бројка од 262, по кои следуваат тепачките, карање, викање и непристојно однесување, омаловажување на овластени службени лица, уживање наркотични дроги, занемарена грижа за дете и други.