Советот на Маврово-Ростуште ќе бара КРИЗНА СОСТОЈБА заради мечките што се шетаат низ селата

Актуелниот проблем со се почестата појава на кафеавата мечка во населените места на подрачјето на Општина Маврово и Ростуште и случаите на влегување на мечките во приватни куќи и дворови на жителите, беа повод за да се организира средба меѓу институциите и граѓаните, со цел да се бара решение. На средбата која се одржа денес во Маврови Анови по иницијатива на ЈУНП “Маврово” учествуваа претставници на месните заедници, Министерствата за земјоделие и екологија, градоначалникот Медат Куртовски и советници на општина Маврово и Ростуше, претставници на МВР, ЈПКД Маврово, како и пратеничката Белкиса Зекири.

„Во обемната дискусија се потврди дека е евидентна пренаможеност на кафеавата мечка како на територија на паркот така и на целиот потег на Шарпланина, и ова станува се поголем проблем за населението. Беше изнесен податок дека на територија на НП Маврово би требало да има 70-тина мечки но во моментов врз основа на постоечките неофицијални податоците се проценува дека таа бројка е далеку поголема и изнесува од 130 до 160 единки. Претставниците на министерствата ја потенцираа потребата од почитување на постоечките закони како и обврските кои институциите ги имаат превземено согласно европските законски регулативи, и притоа се согласија дека состојбата мора да се третира и многу брзо да се дејствува како со носење на нови законски решенија, изготвување на акционен план и итно спроведување на дополнителни мерки за заштита и превенција кои ќе ја намалат опасноста по животот на луѓето.“, соопштија од Националниот Парк.

На средбата беше донесен заклучок со кој се повикуваат советниците на општина Маврово и Ростуше во најкраток можен рок да организираат вонредна седница. Советот на општината од страна на Владатата т.е повиканите надлежни институции ќе побара прогласување на кризна состојба на територија на општината.

„Кризната состојба ќе се побара со цел преземање на дополнителни мерки за заштита на населението, заштита на животот и имотот а со тоа и обезбедување на уставно загарантираното право на секој граѓанин за безбедно, слободно и непречено движење и живеење на територија на целата држава.“, стои во известието.