НДП: Таравари до сега нема сработено ниту еден конкретен проект

Партијата НДП денес во Гостивар на прес конференција го критикуваше општинското раководство и градоначалникот Таравари, дека не работат и шират лаги за нивните членови во Советот и во централната власт.

„Шест месеци од владеењето на новото општинско раководство, нема ниту еден конкретен проект од актуелниот градоначалник. Во овој период слушаме само обвиненија, манипулации и лаги. Освен што упатува обвиненија кон советниците од нашата партија, на градоначалникот му пречат и инвестициите на централната власт во Гостивар. Таравари отиде чекор подалеку и го обвини министерот за локална самоуправа, кој е од кадар  на НДП дека наводно го заобиколува Гостивар и не пушта никакви средства за нашиот град. Повторно лаже. Покажуваме официјален документ од Министерството за локална самоуправа каде се гледа дека се пуштени средства за регулирање на патот кој води до депонијата Русино“, рече Хилми Гаши потпретседател на огранокот на НДП во Гостивар.

Од НДП потенцираа дека нивниот кадар во Владата е ангажиран да се реализираат проекти во Гостивар, додека Таравари по секоја цена се обидува да ги блокира инвестициите од централната власт. „Му порачуваме на актуелниот градоначалник да не се занимава со политичките лидери и големите политики, туку да почне да работи проекти во корист на граѓаните.“, изјави Енис Елези, член на Советот од редовите на НДП.