Повисоки плати во судовите од септември

Од наесен ќе започне да се реализира зголемувањето од 5% на платите на судиите и судските службеници. Ова е констатирано на денешниот состанок на делегација на Здружението на судии и премиерот на Македонија Зоран Заев,  министерката за правда, Рената Дескоска и министерот за финансии Драган Тевдовски.

„На средбата, на која позитивно беа оценети заложбите и реформите насочени кон обезбедување независно судство, претставниците на судиите и на Владата постигнаа договор за формирање работна група со претставници од ресорните Министерства за изнаоѓање системско решение за платите на судиите. Во таа насока, премиерот Заев со претставниците на судиите констатираа дека од септември ќе се реализира зголемување од пет проценти на платите на судиите и судските службеници, како и дека  во тековниот Буџет има обезбедено околу 120 милиони денари за тековно исплаќање на надоместоците согласно Законот за судиите и судските службеници.“, соопшти владината прес служба.

Владата изразила уверување дека уште 120 милиони денари ќе се обезбедат со ребаланс на Буџетот, за ретроактивни решенија на проблемите со надоместоците на судиите.