Дарувајте коскена срцевина за спас на нечиј живот!

Клиниката за хематологија, во соработка со Институтот за имунологија и хумана генетика и Министерството за здравство спроведуваат кампања за дарување на коскена срцевина. Целта е да се подигне свеста и да се поттикнат донаторите да се запишат во националниот дарителски регистар. Дарители на коскена срцевина можат да бидат здрави лица на возраст меѓу 18 и 50 години.

„Пријавувањето во дарителскиот регистер е многу едноставно: се пополнува пријавен лист и се дава примерок крв за ХЛА типизација. При пријавувањето се пополнува и медицински прашалник, кој помага во проценката дали е дарувањето коскена срцевина комплетно безбедно за секој дарител. Се разбира, сите податоци се строго доверливи. Ако сте личност која сака да помогне, размислете за овој прв чекор кон пристапувањето во регистерот. Вас тоа нема да ве чини ништо, а за некој друг би можело да значи спасување на живот.“, наведуваат од Министерството за здравство.

Дарителите на коскена срцевина од Македонскиот дарителски регистер доаѓаат на Клиниката за Хематологија во Скопје, каде тим од стручњаци ја обезбедува коскената срцевина, која потоа се испраќа до болницата каде е хоспитализиран пациентот кој имал потреба од оваа коскена срцевина.

Во земјава, трансплантација на матични клетки прв беше изведена пред 19 години и досега се реализирани повеќе од 550 интервенции.