Донирани прочистувачи за воздух во градинките во Гостивар

Во гостиварските градинки се поставуваат специјални  аеро прочистувачи, со цел дечињата кои се згрижени во објектите, да дишат почист воздух. Министерството за животна средина и просторно планирање обезбеди три, додека денес фирмата Даикин донираше два прочистувачи.

„Во мое лично име, во име на вработените и родителите чии деца престојуваат во градинка, сакам да им се заблагодарам на донаторите. Ова е пример што треба да го следат и другите фирми кои имаат можност да ги помагаат градинките.“ изјави Наташа Саздовска, директор на детски градинки во Гостивар.

Освен за градинките во Гостивар, прочистувачи беа подарени и на Клиничката болница во Тетово и тоа за детското и за гинеколошкото одделение. Донаторите рекоа дека местата биле избрани според нивото на загаденост на воздухот во реонот каде се лоцирани.

Мерните станици во Тетово и во Гостивар особено во зимскиот период од годината, покажуваат високи вредности на штетни ПМ 10 честички во воздухот. Ваквите прочистувачи помагаат во извесна мера да се намали нивното ниво.