Казнети заради неисправни сопирачки – има ли крај на хаосот во јавниот превоз во Гостивар?

Полицијата вчера спроведе уште една од планираните засилени контроли на возилата кои вршат јавен превоз на патници, претежно автобуси и комбиња на гостиварското подрачје. И оваа акција потврди дека нема ред кај јавните превозници и не се почитуваат правилата и прописите, со што дирекно се загрозуваат патниците, како и другите учесници во сообраќајот.

Со контролата во Гостивар вкупно биле опфатени единаесет возила, а техничка неисправност била откриена кај пет од нив. Конкретно четири возила имале неисправни сопирачки, додека едно неисправен уред за управување.

На технички неисправните изготвени им се прекршочни платни налози и веднаш се исклучени од сообраќај, извести Секторот за внатрешни работи.

Контролите врз јавните превозници се интензивираа по трагичната сообраќајна автобуска несреќа на автопатот Тетово-Скопје.