Контроли во Гостивар и Тетово: Фатени алкохолизирани возачи

Над 100 возачи на полошкото подрачје биле опфатени со собраќајна акциска контрола за алкохол, што ја спровела полицијата изминатиот викенд. Во гостиварскиот регион контролирани биле 34, а во тетовскиот 70 возачи.

„Кај девет од нив, од кои 7 во Тетово и 2 во Гостивар било утврдено дека ги управувале возилата под дејство на алкохол и веднаш им се изготвени мандатни платни налози, така што прекршителите ќе се соочат со соодветна парична глоба, која се движи од 250 до 400 евра во денарска противвредност, зависно од степенот на констатираната алкохолизираност. Покрај тоа, за овој вид сообраќаен прекршок предвидено е и времено одземање на возачките дозволи од три месеци до една година.“, информира СВР Тетово.

Во акциската контрола биле откриени се и 19 други видови прекршоци, најмногу управување без возачка дозвола, истечена регистрација и други.

Вакви и слични сообраќајно-контролни активности планирани се и во наредниот период, со цел навреме да се откријат, санкционират и отстранат присутните прекршоци на подрачјето, најави полицијата.