Последен ден за аплицирање за социјален стан во Гостивар-Документи комплетирале околу 200 граѓани

Денес (5 април) во 15 часот и 30 минути истекува рокот за поднесување на апликации со документација за социјалните станови во Гостивар. Изминатите месец дена, колку што траеше огласот, во Центарот за социјална работа се обратиле голем број заинтересирани граѓани кои подигнале апликации, но само дел од нив успеале да ги комплетираат документите.

„Во првите денови имаше голем број на граѓани кои доаѓаа, се интересираа и земаа апликациски листови, некаде околу 550.  Сепак, до овој момент околу 200 од нив успеале да ја комплетираат документацијата. Тие ќе влезат во натамошна категоризација, која ја врши Комисијата составена од Министерствата за труд и социјала и за транспорт и врски, заедно со Центарот за социјална работа Гостивар.“, информира Азби Шаќири, шеф на Секторот за професионална работа во Центарот за социјала во Гостивар, појаснувајќи ги натамошните процедури кои треба да водат кон распределба на становите.

„Најпрво во периодот што следи, ќе вршиме увид во поднесените документации. Тие што ќе ја поминат и таа фаза ќе влезат во специјално креиран електронски ситем, којшто самиот ќе ги рангира семејствата според нивниот степен на загрозеност и потреба. Ако таа бројка надминува 70, колку што има вкупно станови, комисијата ќе врши проверки на терен за фактичката состојба на граѓаните, да види каде и како живеат“, вели Шаќири.

Во социјалната зграда во Гостивар, која се наоѓа на ул „ЈНА“ покрај Кејот на Вардар, треба да се распределат 70 стана со површина од 33 до 44 метри на неколку категории ранливи групи граѓани: деца над 18 години без родители или родителска грижа односно кои до својата 18 година биле згрижени во институции, корисници на гарантирана минимална помош, граѓани погодени од елементарни – природни непогоди, семејства со лица со попреченост, социјално загрозени припадници на Ромската заедница како и самохрани родители со малолетни деца.