Путин се закани: Ќе има сериозни последици за Европа, малите земји си играат со оган

Рускиот претседател, Владимир Путин и се закани на Европа со сериозни последици доколку на Украина и се дозволи во иднина да користи прецизно оружје со голем дострел доставено од Запад врз руска територија.

• Претставниците на НАТО, особено во Европа и особено во малите земји кои се густо населени, треба да разберат со што си играат. Ќе има сериозни последици ако западните земји и дадат дозвола на Украина да го користи нивното оружје за напади врз Русија, овие земји треба да го имаат на ум тоа пред да размислуваат за напади, рече Путин на крајот од неговата државна посета на Узбекистан.

Тој навести дека Русија може да преземе воени контрамерки и рече дека особено помалите земји не треба да заборават дека нивните територии не се големи и дека се густо населени. Путин, кој ја започна руската агресивна војна против Украина пред повеќе од две години, го обвини Западот дека сака „глобален конфликт“.

Италија и Германија ја споменуваат опасноста од дополнително заострување, стравувајќи дека Русија би можела да употреби нуклеарно оружје, додека генералниот секретар на НАТО Јенс Столтенберг, смета дека сегашните ограничувања „ги врзуваат рацете на Украинците “.