Се празнат школските клупи, и годинава одлука на Совет Гостивар за паралелки со помал број ученици

Трендот на намалување на бројката на ученици, не го одминува и гостиварското подрачје. Во школските клупи има се‘ помалку деца, „данок“ на иселувањето, одложување на мајчинството и тековите на формирање семејства со едно до најмногу две дечиња.

Секоја година, Советот на Општина Гостивар гласа за одлука со која дава согласност да се формираат паралелки во училиштата со помалку од 24 ученици, што е пак законскиот минимум. Тоа се однесува и на основните и на средните училишта.

Ваква одлука беше донесена и на денашната седница на Советот.

„Факт е дека се намалува бројката на ученици и како Сектор за образование секоја година бараме согласност од Советот за паралелки со под 24 ученици. Тоа е една формалност што треба да ја поминеме. Дај боже да има повеќе од 24 деца во паралелка, но реалноста е таква каква што е“, рече раководителката на општинскиот Сектор за образование, Аслијан Снопче.

Во период од неколку години бројот на првачиња на гостиварска територија е опаднат за стотина.

Утре, со стартот на новата учебна година ќе се знаат и актуелните податоци за бројката на ученици.