Што е „кристал мет“, опасната дрога која за прв пат беше откриена во Македонија?

Ефтина, лесна за производство, а поопасна од кокаин и хероин. Го остарува организмот и носи смрт по две, три години употреба. Ова се карактеристиките на дрогата кристал мет или “кокаин за сиромашни” која за прв пат беше пронајдена во Македонија во акција на полицијата во куќа во скопското село Грчец каде МВР откри лабораторија за нејзино производство.

Типичен зависник од кристал мет има чувство дека по телото го лазат инсекти, што му предизвикува неконтролирано чешање до создавање на рани. Од дрогата за кратко време почнуваат да паѓаат забите, нагло се слабее и се оштетува нервниот систем.

Кристал мет има психоактивно дејство и го држи организмот буден. Се користела во Втората светска војна, под името Первентин како средство против замор и им било давано на пилоти и тенковскиот екипаж кои имале долги ноќни мисии.

Поради тоа што не чини многу, се нарекува „кокаин за сиромашни“. Инаку за прв пат била синтетизирана во 1919 година од јапонскиот хемичар Акира Огата.

Стигнал ли кристал мет на црниот пазар во Македонија или е навреме откриена? МВР вели дека најверојатно дрогата во земјава е откриена пред да биде пуштена во промет, но сепак истрагата за овој случај продолжува.