Со дрога годинава во Гостивар фатени 48 лица, меѓу нив и тинејџери

Во изминатите без малку осум месеци од годинава, заклучно со денеска (29 август) на подрачјето на Секторот за внатрешни работи Тетово лишени се од слобода вкупно 296 лица (Тетово-248 и Гостивар-48) кај кои биле пронајдени и одземени наркотични средства.

„На најголемиот број од нив, набргу по лишувањето, изготвени им се поднесоци за „неовластено производство и пуштање во промет на наркотични средства, психотропни супстанци и прекурсори“, кривично дело казниво по член 215 од Кривичниот законик. Неколку од нив, пак, се соочиле од поднесоци за„ овозможување употреба на наркотични дроги“ согласно член 216 од Кривичниот законик.“, информира портпаролот на СВР Тетово, Марјан Јосифоски.

Кај лишените лица годинава најчесто се пронајдени и одземени марихуана и кокаин, а поретко и хероин. Меѓу лишените евидентирани се и малолетници со 16 и 17 години, како и извесен број на лица кои го повторуваат делото. Од СВР Тетово подвелкуваат дека интензивно се ангажирани на откривање и законско санкционирање на лицата инволвирани во продажба на наркотични средства во координација со други институции.