Социјалните станови во Гостивар ослободени од плаќање приклучок за комуналии

Советот на општина Гостивар на последната седница, која се одржа минатата недела донесе одлука за ослободување од плаќање на надоместок за приклучок на водоводна и канализациона мрежа на зградата со социјални станови. Барањето за ослободување било поднесено од тетовската подружница на АД за изградба и стопанисување со станбен и деловен простор, коешто го гради објектот.

Како што беше објаснето на седницата, ваквиот чекор се презема земајќи во предвид дека се работи за зграда наменета за домување на социјално ранливи категории граѓани. Ослободувањето е еднократно, односно се однесува само на таксата за приклучок.

Изградбата на социјалните станови во Гостивар, лоцирани покрај Вардар, близу големиот мост, започна пред околу три години. Проектот е вреден околу 85 милиони денари. Зградата со две ламели, има вкупно 70 станови кои треба да се распределат на семејства од ранливи категории.