Вештачењето треба да ја реши мистеријата за пронајдените коски во пештерата во Корито

Експертското вештачење треба да утврди од кој период датираат остатоците пронајдени во пештерата во атарот на гостиварското село Корито и како се нашле таму. Полициски службеници, претставници на Дирекцијата за заштита и спасување и на Секторот за антитероризам извршиле увид на местото и по фотографирање на остатоците ги предале за вештачење.

Човечки коски, дел од активирана граната за рачен фрлач, ловечка пушка и повеќе парчиња облека беа пронајдени во пештарата на длабочина од околу 20 метри, по пријава на спелеолози од клубот „Кораби“ кои ја истражувале.

„Претседателот на спелеолошкот клуб во саботата пријавил дека додека истражувале пештера на местото викано „Чавкарник“ во село Корито, забележале остатоци од неколку черепи и една неексплодирана граната“, информираа од МВР. По пријавата бил известен Јавен обвинител, кој наредил увид на местото.