Во Гостивар се гради првата од три предвидени катни гаражи

На локација во градскиот парк близу Кејот на Вардар во Гостивар се изведуваат работи за изградба на катна гаража. Тоа е првата од вкупно три кои се предвидени да се градат во градот, со цел да се обезбедат повеќе паркинг места и да се олесни протокот на сообраќај.

„Планирани се три катни гаражи, од кои едната веќе почна да се гради близу шеталиштето на Вардар. Другите ќе бидат близу болницата и социјално. Вкупниот капацитет на трите ќе биде за над 200 возила. Сакам да истакнам дека во Генералниот урбанистички план од 2016 година предвидени се катните гаражи, исто така и во деталните урбанистички планови кои се донесени потоа, согласно ГУП-от, а одлуката помина и во Советот на Општина Гостивар.“, информира раководителот на Секторот за урбанизам во општината, Семир Зулбеари.

Катните гаражи се реализираат по моделот на јавно-приватно партнерство во кое се вклучени општината и две приватни компании. Зависно од временските прилики, ако оди се според предвиденото, ќе биде готова до крајот на годината или на почетокот на следната година. Стартот на градежните работи за останатите две, исто така зависи од временските услови, доколку се поволни најавите се дека би почнале есенва. Во спротивно, надлежните информираат дека тоа би се случило напролет догодина.

Во Гостивар на располагање се 840 паркинг места во зонско паркирање и два паркинзи од затворен тип, што ни оддалеку не ги задоволува потребите. Недостигот на паркинг места е проблем што се провлекува со децении, особено потенциран во периодите кога поради престојот на печалбарите се зголемува фреквенцијата на сообраќај и се создаваат големи гужви низ улиците.