За фискалните скенирани од 12 јуни наваму, 20% поврат на ДДВ од македонски производи

Измените во пресметка на повратот на ДДВ ќе важат за фискалните сметки скенирани од 12 јуни наваму. Тоа значи дека повратот на делот од данокот на додадена вредност пресметан на прометот на македонски производи ќе се врши во висина од 20%, а за останати добра и услуги во висина од 10%.

„Со цел имплементација на мерката преку која се поттикнува потрошувачката на македонските добра и услуги, Управата за јавни приходи брзо и ефикасно ја прилагоди апликацијата МојДДВ преку која на граѓаните кои скенираат фискални сметки за купените македонски добра и услуги ќе им се изврши поврат во висина од 20%, а за останатите добра и услуги во висина од 10% од пресметаниот данок искажан во фискалната сметка. Со овие прилагодувања, за скенираните сметки од 12.06.2020 година, повторно ќе се изврши пресметка, според раздвојувањето на македонски добра и услуги со 20% и останати добра и услуги со 10%, наместо досегашните 15% поврат на ДДВ. Поради оваа повторна пресметка износот на повратот на ДДВ кај физичките лица за второто тримесчје може да претрпи промена.“, информираат од УЈП.