Загадување: Во Гостивар со месеци не се мери нивото на штетните ПМ10 честици

Повеќе од четири месеци гостиварци не знаат каков воздух дишат. Мерната станица во Гостивар не го покажува нивото на загадување со штетните ПМ 10 честички. На интернeт страницата на Министерството за животна средина, каде се објавуваат параметри од мерењата на аерозагадувањето, податоци присуството на ПМ10 за Гостивар, нема подолг период, а така остана и во досегашниот тек на грејната сезона.

Од Министерството за животна средина, пред околу еден месец соопштија дека на пет мерни станици меѓу кои и онаа во Гостивар, одредени инструменти заради дотраеност, се во фаза на замена.
„Во однос на инструментите за мерење на РМ10 честичките, во тек е спроведување на постапка за набавка на 5 нови инструменти за мониторинг станиците: Лисиче, Велес 2, Кавадарци, Кичево и Гостивар. Истите треба да се инсталираат и пуштат во употреба најдоцна до 20 Декември 2019 година.“, наведоа од Министерството.

Мерната станица во Гостивар изминатите години за време на грејната созона покажуваше големо присуство на суспендирани честитки во воздухот. Поставеноста на станицата е таква што се очекува да се регистрира уделот на загадувањето кое доаѓа претежно од согорувањето на горива за затоплување на административните згради и приватни живеалишта во зимскиот период од годината како и помал удел кое доаѓа од загадувањето од сообраќајот.

Малите вдишливи честички може да бидат едни од најштетните загадувачки супстанции во воздухот и може да продрат длабоко во респираторниот систем на луѓето. Содржат канцерогени метали, прав и други материи опасни по човековото здравје.