Засилено полициско присуство околу училиштата во Гостивар

Со почетокот на новата учебна година, Секторот за внатрешни работи Тетово, превентивно го засили полициското присуство околу училиштата на подрачјето, особено пред и по завршување на наставата, за време на големиот одмор и на автобуските и такси-постојките, од кои тргнуваат и на кои пристигнуваат учениците.

Зголемено полициско присуство се практикува, исто така, на крстосниците и сообраќајно најфрекфрентните улици во Тетово и Гостивар и пред се на оние кои водат кон училиштата, со цел да се обезбеди непречено и безбедно движење, посебно на помладите основци.

„Апелираме до возачите да водат сметка каде ги паркираат нивните возила, да ја прилагодат, односно намалат  брзината  во близина на училиштата и секогаш да им даваат предност на пешаците. На  пешаците, пак, им се укажува да внимаваат каде ги преминуваат улиците и да не се движат по коловозните ленти, туку исклучиво по тротоарите. Ова, пред се се однесува на учениците, за да се избегнат несакани појави и проблеми од сообраќајно-безбедносна природа и карактер.“, наведуваат од СВР.

Од полицијата велат дека неделава ги интензивирале и активности за отстранување на непрописно паркираните возила и за откривање и законско санкционирање на узурпации на јавните сообраќајни површини за трговски, угостителски или други намени.