Грипот се шири меѓу гостиварци – за една недела околу 200 заболени

Гостивар останува град со најмногу заболени од вирусот на грип сезонава во Македонија. Заразата се шири и секојдневно расте бројката на пациенти.

Според последните податоци од Институтот за јавно здравје, за една недела на гостиварското подрачје, грип фатиле 183 лица. Заедно со нив, вкупната бројка на заболени достигнува скоро 500, што според анализите на надлежните значи дека во Гостивар има средна активност на вирусот. Во останатите градови низ земјава, активноста на грипот е дефинирана како многу ниска или сезонска.

Во следниот период, епидемиолошката служба ќе зема на брисеви од заболени со типични симптоми на гри, со чија анализа ќе се утврдува за кој точно тип на вирус станува збор.

Дополнителен ризик за ширењето на грипот претставува почетокот на второто полугодие, поради што лекарите препорачуваат учениците, но и сите граѓани да го подигнат нивото на превенција: да одржуваат редовна хигиена на рацете, да внесуваат храна која содржи витамини, да пијат топли пијалоци и да избегнуваат контакти со заболени.