Објавен регистарот на професионални онлајн медиуми – Gostivarpress.mk меѓу 67-те на листата

Денеска на прес-конференција во Скопје, од страна на Здружението на новинари на Македонија (ЗНМ) и Советот за етика во медиумите на Македонија (СЕММ), беше презентиран Регистарот на професионални онлајн медиуми, во кој има вкупно 67 членки.

На листата се најде првиот и убедливо најпосетуван електронски медиум од регионот, Gostivarpress.mk.

Ова е уште едно признание за Gostivarpres.mk, кој повеќе од 3 години е препознатлив симбол на објективно информирање со висок степен на доверба, а потврда се илјадниците верни читатели и бројните задоволни клиенти кои со успех ги промовираат своите компании, бизнис услуги и производи на платформата на Gostivarpress.mk.

Во регистарот влегуваат онлајн медиуми со транспарента сопственичка структура, кои се обврзуваат дека ќе ги почитуваат професионалните стандарди и ќе објавуваат информативни содржини.

Воедно овој регистар ќе и послужи и на Стопанската комора на Македонија, така што бизнис-заедницата ќе биде свесна за рекламирањето во професионални онлајн медиуми, наспроти оние кои не ги исполнуваат критериумите за членство и редовно ги прекршуваат етичките стандарди. Ставот на ЗНМ и на СЕММ е дека саморегулацијата е најмоќно решение за поттикнување на професионалноста во медиумите, не само во сегашни околности, туку и на подолг рок. Доколку некој од членовите ги прекрши стандардите ќе биде избришан.

Gostivarpress.mk e членка и на ИАБ Македонија, која e дел од Interactive Advertising Bureau (IAB), водечка асоцијација за унапредување на дигиталниот маркетинг во светот, чии членки се Google, Facebook, Amazonadvertising, Adobe и други.