Предлог за граѓански протест против депонијата Русино кај Гостивар

Депонијата Русино во близина на Гостивар изминатиот период честопати гори, а револтот кај граѓаните од загадувањето расте. Секојдневно преку социјалните мрежи се објавуваат фотографии на кои може да се види дека состојбата е сериозна и неопходна е итна интервенција.

Граѓанската иницијатива „Стоп Русино – чист воздух за Гостивар“ преку група на Фејсбук бара најпрво акутно да се реагира на палењето, а потоа да се изнајдат решенија за дислокација на депонијата.

Групата моментално брои над 5.300 членови, при што во постовите и коментарите постојано се повикува на заедништво, без национални, политички и други поделби.

Од иницијативата денес излегоа со предлог да се организира протест, а со оглед на актуелната пандемија тоа да се спроведе согласно препораките, во кој пишува:

„Предлог за протест во време на епидемија!!!!! Сите со своите автомобили и по двајца во автомобил со маски на протест на 05.07. Недела, спремајте се!!!!“.