Наместо во училиште со книга, деца го минуваат денот низ улиците питачејќи

Деца кои наместо во училишни клупи, денот го поминуваат на улица. Животни приказни во кои детската игра е заменета со талкање и питачење, за жал не го одминуваат ни гостиварското секојдневие. Занемарени од родителите и роднините, овие деца се оставени само на себе, без грижа и потребната љубов од семејството.

Статистиката на полицијата покажува дека, минатата година на полошкото подрачје биле регистрирани 24 случаи на занемарена грижа на дете. Стручните лица посочуваат на последиците од ваквата појава, врз развојот на децата и нивниот натамошен живот. „Ако едно дете препуштено на улица не спие, не јаде редовно, нема свое постојано живеалиште, семејство, другарчиња, во иднина самото ќе има проблеми да воспостави сопствен нормален дом. Она што ќе го наследи од своите родители не е ништо друго, туку еден живот со талкање, со питачење. Тие деца многу лесно стануваат жртви на дрога, алкохол и останати пороци. Тука се јавува и феноменот на проституција, бело робје и низа проблематики кои потекнуваат од растењето на таков начин“, вели Билен Карахасан, психолог во Центарот за социјална работа во Гостивар.

За да може едно дете да се извлече од улица и да се социјализира, потребно е координирано делување на институциите и создавање на соодветни услови. „Тоа подразбира постоење на одредени центри за згрижување на децата кои питачат, или на целото семејство. Се работи за сложен проблем за кој требаат многу финансиски средства, но сметам дека тоа е исплатливо за едно општетсво , затоа што ќе се намалат ризиците од појава на нови генерации на питачи и ќе се зголеми бројот на општествено корисни луѓе, смета психологот Карахасан.

Изминатите години социјалните служби во Гостивар успејаа да оттргнат повеќе деца од улица и да ги вратат во образованиот систем. Неколку од нив се сместени во интернатот во Маврови Анови, а неколку се згрижени во Домот за деца без родители во Скопје.

Занемарувањето грижа за дете претставува прекршок за кој е предвидена казна  од 600 до 800 евра, но зависно од крајните последици, родителите или други инволвирани лица можат да бидат и кривично гонети.