Се гради канализација во гостиварското село Здуње

Во гостиварско Здуње отпочна изградба на канализација која треба да покрие околку половина од домаќинствата во селото. Проектот е на Јавното претпријатие „Комуналец“ и општина Гостивар. Канализационата мрежа е долга околу еден километар и според најавите ќе се комплетира за три недели.

„Нашето село е мултиетничко, кадешто живеат Македонци, Албанци и Турци и овој  проект е за доброто на сите, затоа сме благодарни на општината за инвестицијата“, рекоа жители на Здуње кои го пречекаа градоначалникот Арбен Таравари на местото на почетокот на работите.

За точната сума, колку ќе чини канализацијата, градоначалникот рече дека медиумите и јавноста дополнително ќе бидат известени. Во својата изјава нагласи дека како локална власт периодов ќе реализираат повеќе инфраструктурни зафати.

„И покрај опструкциите и пречките, ние работиме. Ова е една од капиталните инвестици кои ги ветивме во предизборната кампања. Во текот на следните денови предвидено е да се започне со реконструкција на патот Лакавица-Србиново, како и со изградба на водоводот во селото Дебреше“, изјави Таравари.